3- يوم الإنترفيو – المقابلة الشخصية بمعهد ITI

لبست لبس مش عادى ( لبست البدلة ) مغسولة وقميص أبيض وكارفاته ( ممكن متلبسهاش ) وظبطت المسائل ومشيت بدرى.

أول مشكلة هتقابلك المواصلات : الحل إنك تمشى بدرى حبتين عشان توصل قبل ميعادك .

المهم الحمد لله وصلت قبل ميعادى بحوالى 20 دقيقة ، إنتظرنا فى الكافيتيريا ، لاقيت شباب كتييير قاعد ، اللى بيذاكر مش عارف إيه ، واللى كان مفكر نفسه رئيس المعهد وعمال يقول المعهد هيعمل كذا وكذا ، واللى كان يفتى .

المهم كبرت دماغى منهم ، وقررت إنى ألتزم بالخطة رقم 88 الخاصة بيا وطبعا متسألنيش إيه هى الخطة دى لأنى مش عارف هى أيه أصلاً .

المهم ، حافظت على هدوئى ، وفجأة واحدة زى القمر قالت

From A to M in 2016, From N to Z in 2020

وبعد سؤال الخبراء المترجمين قالوا إنها بتقول " اللى إسمه بادئ من حرف الألف إلى حرف الميم يروح للقاعة رقم 2016 واللى إسمه بادئ من حرف النون إلى حرف الياء يروح القاعة 2020 "

طبعاً الحل :

أنا إسمى صلاح إذن أنا حرفى ص

ص = S

N – O – P – Q – R – S وده طبعاً معناه إنى تبع من N إلى Z وطبعاً رحت القاعة 2020.

إتجمعنا هناك ، دخلت القاعة نفس البنت – سبحان الله – وكانت برده زي القمر .

بعد شوية قالت عاوزة أخد الأتندس = Attends أنا قلت لما تسألنى هقولها أنا مختار Open source وUNIX عشان أنا مختار تراك Open Source وتراك UNIX لكن للأسف طلعت بترجم غلط لأن

الأتندس = Attends يعنى بتاخذ الحضور والغياب للمجموعة .

قلت الحمد لله إن أنا أسمى بادئ بحرف ال ص وإلا كان كله ضحك عليّا دلوقتى .

شوية كمان وقالت كل واحد هيأخذ ورقة هيكتب فيها Paragraph مكون من 5 سطور ووزعت الورق والسؤال كان بيقول : أكتب فى خمسة سطور عن أصعب مشكلة واجهتك فى حياتك ؟ ( طبعاً بالإنجليزى )

وطبعاً كتبت .

بعد شوية بدأت تنادى على مجموعة من الأسماء كنا حوالى 5 قالت روحو القاعة رقم ( كذا ) قسم ال UNIX (طبعاً بالعربى) وكان فى عامل مشترك بنا إحنا الخمسة ( كلنا كنا مختارين UNIX ) ، وقالت برده بعد ما تخلصوا فوق تعالوا هنا تانى.

فى التدوينة الجاية هاقولكم إيه اللى حصل .

تعديل الرسالة…